MUSEO DA FUNDACIÓN FERNANDO BLANCO DE LEMA.
Praza da Constitución, 25. 15270 - Cee (A Coruña).
Tel.: 981.74.72.21.
e-mail: fundacioncee@hotmail.com

Un dos obxetivos principais do Museo é dar a coñecer a vida de D. Fernando Blanco de Lema, así como a difusión do patrimonio histórico do que foi un dos principais e máis admirados Colexios de Galicia.
Polo tanto, poñemos á disposición dos grupos que o desexen, de xeito totalmente gratuito e previa cita (tel.: 981.74.72.21), a posibilidade de recibir unha visita guiada polas nosas instalacións, da que a bo seguro levarán unha grata lembranza.

Horario

HORARIO DE INVERNO (de outubro a xuño)
Martes a venres	De 9:30 á 13:30 horas
Sábados	De 9:30 á 13:30 e de 17 a 19 horas
Domingos, luns e festivos	Pechado

O 11 de agosto do ano 2001 abreu as súas portas, por primeira vez ó público, o Museo da Fundación Fernando Blanco de Lema, situado no número 25 da Praza da Constitución da vila de Cee.
Polo acordo do Consello da Xunta do 9 de xuño de 2005, o Museo foi recoñecido coma Colección Visitable de carácter científico-técnico e artístico.
Como sede do Museo elixiuse o edificio da antiga Escola de Nenas, erixido pola Fundación Fernando Blanco de Lema no solar da vella casa do mecenas, baixo a dirección do arquitecto madrileño José Mª Aguilar.
Disponse así dunha sede amplamente vencellada á Fundación, nun edificio histórico de arquitectura nobre e singular, rehabilitado específicamente para sede do Museo, e localizado no centro da vila, con grande accesibilidade.

O Museo conta con dúas plantas adicadas, case por enteiro á exposición de fondos.
A planta baixa conta cunha sala de exposicións de 142,30 metros cadrados, coa que se pretende achegar ós visitantes unha visión histórica da Fundación, do labor desenvolvido e do carácter interdisciplinar e innovador das súas actividades educativas.
Nesta sala sitúanse os fondos artísticos que requiren especiais condición de conservación e mantemento (cadros), xunto cos contidos educativos de maior incidencia social na vila, coma a música, o debuxo ou os saberes relacionados coa agricultura.
O primeiro andar, formado por unha única sala expositiva de 200,20 metros cadrados, resérvase para a realización de exposicións temporais. Cando non está programada ningunha exposición temporal, o espacio resérvase para o que, con diferencia, constitúe o máis armónico e numeroso fondo patrimonial: a colección de instrumental científico e material didáctico das cátedras de física, química e historia natural.